Pastorada año 2006
Mayoral
Biembenido sía
iste seleuto auditorio
de o que pasa por o mundo
yo quio daros notorio.
En o mío nombre y de os lanzantes
en primeras quereba agradezer
que estez con tanta atención
toa ista caterba chen.
Que mamá siempre me ha dicho
que o primero ye a educazión
pos si por algo me podez carrañar
no ye ixa a mía intenzión.
Si ez parau cuenta
que a mía fabla ye un siñal aspra…
Buen cabal!
Santa Orosia me entiende,
que yo le charro a ella
dende aíntro d’a mía alma.
Grazias tamién a os romeros
que de tantos lugars eis plegau
con o ropón y o palo
como tantos antepasaus;
Grazias a os cruzeros
que’n bienen de toa a Montaña
trayez a millor joya buestra
pa engalanar ista fiesta;
Y a os zereños banderistas
de ro Balle y Sobrepuerto.
Qué argüellosos nos sentimos
de que abandiez sin rangüello!
Memoranza pa os que iste día
con nusotros no puen estar
Santa Orosia se alcordará
de a fé que le eis tenido en bida.
Punto
Cantas
¡Cuánto gozo, qué contento
de golber-nos a alcontrar
pa astí chuntos zilebrar
a fiesta e Santa Orosia!
¡Ixe beso que se dan
cruzes, palos y banderas
ye un beso d’amistá
entr’as chens d’a nuestra tierra!
Mayoral
Asta Fablo han traído notizia
de que nazió Alionor
dizen que será reina
si cambean a costituzión.
A yo rai quien gubierne!
buen cabal quien reinó!
sólo demando una cosa,
que se alcuerden de Aragón.
Y seguindo con a demanda,
a bier si sentiz, zagalas,
yo estoi mirando de achustar-me
una reinona pa casa.
Dos cosetas cal que tienga:
una, que sía bien plantada
y tamién si podese estar
un siñalín escoscada.
Tampoco no iría mal
que sabese fer a colada,
que abentase as guixas,
y quitase as esparias.
Fese media y a calderada,
que tamién labase ensundias,
y o mondongo de güena gana,
y anque no le cuaquen os bichos...
cómo no ba a muyir as crabas?
Y si m’ejáis pensar un rato
no remato ista mazada.
Besos en tiengo pa todas
anque baigan malfarchadas.
Repatán
No’n creyes que será muito?
Tú sí que t’has echau largo!
Ya te se bajará a pez a o culo
que pa amprar-ne uno como tú
No’n hai pocos por o mundo!
Te’n marchas ta ro mercau
y en alcontrarás un ziento,
seguro que son millor chen
y sin tanto miramiento.
Yo te iba de dar un consello
pero no te fará o morrocló;
pue que quedes pa cabalero
u quemisió… pa tión.
Y qué he sentido n’o Barrio?
que han sacau nuebas leis
y se puen casar os güeis?
Y altonzes as bacas?
Y chotos y crabas?
De os cochins ya en sabeba
en conozco más d’una parella.
Y no ha dicho cosa o clero?
Ixo me pai que be d’estar
otra basemia de Zapatero.
Charrando-te d’o clero
pai que te xordicas
cuan has d’entrar ta misa
n’o imbierno porque fa frío
y adormido s’está millor
y n’o berano con a calor
ya pue quedar a badina d’o río.
Con o poco que estomagas
o tema d’a religión
ya me dijon que te bión
debió estar que te bagaba
astí en a primer plana
cuan bino a telebisión.
Qué debozión tenebas
en ixas rogatibas!
cuan biebas que os tomates
n’o güerto te se moriban.
Que o sequero que pasemos
no torne a dar-se más,
que pleba a gusto de toz
y que ixa fuen que béis
nunca s’eje de manar.
Punto
Mayoral
No sé que fa o rebadán
que pa sacar-me as colors
tiene muita fazilidá.
Ya nos ibamos olbidau
de benerazions y rogatibas
de cantar as letanías
pa pedile a Sta. Orosia
que plebese n’os nuestros praus.
En a zaguer sanmigalada,
cuando o sequero más apretaba,
namas o zielo podeba aduyar-nos,
nos chuntemos por tres bezes
pa pedir-le a Sta. Orosia
que plebese a cabazos.
Con as cruzes y os romeros,
y ro toque d'as campanas
que alcompaña as rogatibas,
as chens de ra Sotonera
y de toa ista Montaña
nos golbimos a chuntar
pa pedir-le a Santa Orosia
que plebese en istos lugars.
Si no estase por Santa Orosia
no sabemos que abría pasau
sólo sé que to l’imbierno
Auturía ha estau to nebau.
Yo no sé que gusto tiens
por fer-me quedar mal
que a zaguer bez que m’alcompañés
con un siñal de debozión
fue en San Chinés d’Espín
cuan as güegas bendizión.
Asta esti año biebas
acucutar o sol por as leras
pero a bezinal y “O Zoque”
apañón o tellau y a torre.
Agora que aquí biemos
a istituzions y jerifaltes...
No queremos que o de San Román
en dengún lugar más pase.
Mirar d’echar bel euro
ta ixa ilesia Escartín
antes de que le plegue
como a o cochín su San Martín.
No tos amaguez n’o cado
ferez onra a ra Montaña,
a toz os que astí bibión
y a os que oi tos alcompañan.
Amás de to isto
mención quereba fer
a ixe lugar d’Allué
que una lampa toas nueis
dende ro año pasau se bé.
Que sían biembenidos
ixos nuebos bezinos
y pa que siamos más amigos
aspero que cuan baigamos
nos imbiten a magra e tozino
y güena pixela e bino.
Punto
Repatán
Miraros que ocho danzantes
que dentre toz no saben fer
ni un triste bayo dreito
que igual te´n fan de rebés.
Y no prebes a izir-les cosa,
pue que sientas o que no quiers,
que denzima te den un lapo
y te se quede cara e pabiso.
No hai potenzia con ellos,
no conozen ni o pimpirigallo
o unico que saben d'ordio
que con cerbeza ban a pixar-lo.
Y de bichos...
si tiene pelo será conello
y si no, será un gallo.
No bierás que les ne achunten
Tiengan pelo u en tiengan pluma
No baiga estar por un casual
Que les pille a gripe abiar.
No son poco más agudos
si tien elante o plato!
eslegirán a millor pizca.
No comas con ellos a rancho!
De cans en tienen toz
pero sólo que pa pasiar-los.
T'ande han quedau ixos cans
con caparras y cacalos?
Agora cacalos en leban ellos
les dizen "rastas" os fozinallos
to bale si ye moderno
pero si o can mío en leba
altonzes ye un guarro.
Me causan almirazión
Ista colla e galbans,
dí que lo menos pa danzar
una miaja e rasmia se dan.
Toca ro chuflo en Fa
Y asinas blincarán más.
Punto
Mayoral
Media bida he pasau
esfumarriando betiquera
agora o gubierno me dize
que ixo ye una fatera,
que o mon ye zentro e treballo
o mesmo articas y sasos
que elante as güellas no fume
que les güele a lana á tabaco
y asinas ye que no les achuntan
ni mardanos ni segallos.
Agora quereba charrar
y no quio cheneralizar
d'os chobens que ista noche la pasan
en puerto toa plena en bela
con ixa mosica fiera
que t'abatana as orellas
No sé si bibirán en zolles
tiñas, cuadras u yerberos
sólo sé que cuan d'aquí marchan
nos ejan güena femera
Te miras enta ista tasca
si bienes pa Sta. Orosieta
y te saltan glarimas d'os güellos
toas ellas de impotenzia.
Basura por toz os laus
ni o más sagrau se respeta,
y luego se les plena a boca
d’o cudiau de ro ecosistema.
Y quien quiera ascuitar que ascuite
y quien no, que la otro año no'n bienga.
Y pa poder rematar
a chanzoneta y os dichos
yo tos encargo y suplico:
¡Si algo tos ha molestau,
que lo ejéis en l’olbido!
¡Y pos yo en nombre de toz,
Orosia, lizenzia os pido,
pa poder-le esplicar,
con tu grazia y con tu ausilio,
á iste auditorio que está
asabelo qu’atento y benigno,
con conzieto d’ascuchar
a tuya bida y prodigios!
Martirio de Santa Orosia
Culminazion d'os elogios
Mayoral
¡Qué tos pai, oyentes míos,
qué bida tan miragrosa,
qué inozenzia, qué birtús,
y qué muerte tan dichosa!
¡Ánchels se’n bajón d’o zielo
que le trajon a corona,
y en a palma la subión
ellos mesmos enta a Gloria!
¡A Suprema Trenidá,
por a suya gran fortaleza,
le otorgó muitas grazias
y muchismas preferenzias!
¡En ixas tronadas fieras
nos efiende de ra piedra,
d’ixas brutas abenidas,
d’os rayos y d’as zentellas!
¡En os partos perigrosos
ye asaber qué medianera,
y por ella merezemos
o benefizio de l’augua!
¡Ella cura endemoniaus,
ella á ros enfermos sana,
ella asiste á ro afligido
y á ro que con ferbor la clama!
Cantas
¡Biba ra debina Orosia
con su grandismo Martirio!
¡Biba ista fiesta tan biella,
alma d’iste Pirineo!
Asinas yo tos espido:
¡Plantar fuerte y no reblar
¡Qu’otra añada n’ista fiesta
nos golbamos alcontrar!
Mayoral
Prenzipiaré á espedir-me
por ixe Templo sagrau,
ixa fuen tan eliziosa
y por iste florido prau!
¡Adiós á Cueba d’Orosia,
lugar d’o suyo martirio,
adiós á ixa Ilesia que fue
d’as suyas reliquias sagrario!
¡Adiós á o siñor Retor,
mui querido Mosen José,
y á o siñor Pedricador,
con clero y autoridades!
¡Pa rematar, Santa mía,
recordanza imos de fer
de toz os debotos tuyos
qu’en ista zaguer añada
ta la otro mundo se’n fuen!
¡Asinas tamién quisiera
grazias dar á tanta chen,
que con tan grandisma fe
partizipó n’ista Fiesta!
¡Orosia, Santa mía!
¡Mira-te ta tanta chen,
que de tan lejos binon,
agradeze-les a suya fe
y o gran esfuerzo que fizon!
Os que escribimos y charramos
podébamos fer-lo millor
pero no tos quede a duda
que se fa con güena intenzión.
¡Grazias por a buestra atenzión,
de toz busotros yo m’espido!
¡Dios nos dé a Gloria Eterna
por os siglos de ros siglos!